အင်​ဂျင်​ပါ​ဝါ ၁​၃​၀​၀ စီ⁠စီ​အောက် ကား​များ​ကို ပါ​မစ်​သီးခြား​မ​လို​ပဲ လွတ်လပ်​စွာ တင်​သွင်း​ခွင့်​ပြု​မည်

မေ​လ ၅ ရက်၊ ၂​၀​၂​၁ ခု​နှစ်၊ (YPI) အင်​ဂျင်​ပါ​ဝါ ၁​၃​၀​၀ စီ⁠စီ​အောက် ကား​များ​ကို ပါ​မစ်​သီးခြား​မ​လို​ပဲ လွတ်လပ်​စွာ တင်​သွင်း​ခွင့်​ပြု​မည်​ဆို​သည့် အတည်​မ​ပြု​နိုင်​သေး​သော သ​တင်း​ထွက်ပေါ်​ပြီး​နောက် ရန်ကုန်မြို့​ကား​ဈေး​ကွက်​တွင် ကား​ဈေး​ထိုး​ကျ​သွား​ကြောင်း ဟံ​သာ​ဝ​တီ​ကား​ဝိုင်း​မှ ကား​ရောင်းဝယ်​သူ​များ​က ပြော​သည်။ ယခု​သ​တင်း​ကြောင့် ကား​ဈေး​သာ​မက ကား​ပါ​မစ်​ဈေး​များ​လည်း သိသိ​သာသာ ကျ​ဆင်း​သွား​ကြောင်း ကား​ဝယ်​ရောင်း​များ​၏ ပြောဆို​ချက် အရ​သိ​ရ​သည်။ ဝယ်​ရောင်း ကား​ပိုင်​ရှင်​တ​ဦး ဖြစ်​သူ ဦး​သက်​လင်း​က “မနေ့​ညနေ​က ဈေး​ကွက်​မှာ ၁​၃​၀​၀ စီ⁠စီ​အောက် ကား​တွေ​ကို လွတ်လပ်​စွာ​တင်​သွင်း​ခွင့်​ပြု​ဖို့ စည်းဝေး​နေ​ပြီ​ဆို​တဲ့ သတင်းထွက်​ပြီး ကား​ဈေး​တွေ သိန်း ၃​၀၊ ၄​၀ ကျ​သွား​တယ်၊ ဘယ်​သူ​မှ မ​ဝယ်​တော့​ပဲ ဖြစ်​နေ​တယ်” ဟု YPI သို့​ပြော​သည်။ အခြား​ကား​ဝယ်​ရောင်း တ​ဦး​က​လည်း ယမန်နေ့​ညနေ​က ကား​ဈေး​ကွက်​တွင် ဈေး​ကျ​ဆင်း​သွား​သည်မှာ မှန်ကန်​ကြောင်း အတည်ပြု​ပြောဆို​သည်။ အင်​ဂျင်​ပါ​ဝါ ၁​၃​၀​၀ စီ⁠စီ​အောက်​ကား​များ​တွင် မီ​နီ​ဆ​လွန်း ကား​အမျိုး​အစား၊ ဆူ​ဇူ​ကီ ဝေ​ဂွန်​အာ​ပ​လပ်စ် ကား​မျိုး​လို ကား​အငယ်​များ ပါဝင်​နိုင်​ပြီး ယင်းသို့ လွတ်လပ်​စွာ တင်​သွင်း​ခွင့်​ပြု​ပါ​က အငှား​ယာဉ် နှင့် မြို့တွင်း​အိမ်​သုံး​စီး​သူ​များ အနေ​ဖြင့် ဈေးနှုန်း​သက်သာ​စွာ ဝယ်​စီး​နိုင်​မည့် အလားအလာ​ရှိ​ကြောင်း ကား​ဝယ်​ရောင်း​များ​က ခန့်​မှန်း​ပြောဆို​သည်။ ယမန်နှစ် လယ်​က​စတင်​လိုက်​သည့် ယာဉ်​အို​ယာဉ်​ဟောင်း​များ အပ်​နှ​၍ ကား​အစားထိုး​တင်​သွင်း​ခွင့်​ပြု​သည့် အစီ​အစဉ်​ကြောင့် ဆယ်​စု​နှစ် တ​ခုကျော်​မြင့်​တက်​ခဲ့​သည့် ကား​ဈေး ၃ ချိုး ၂ ချိုး ကျ​ဆင်း​ခဲ့​သည်။ ယခင်​နှစ်⁠နှစ်​ဝန်းကျင်​က သိန်း ၁ ထောင်ကျော် ရှိ​ခဲ့​သည့် တို​ယို​တာ မတ်​တူး​ဆ​လွန်း (ရွှေ​ငါး) အမျိုး​အစား​မှာ ယခု​အခါ​တွင် ကျပ် သိန်း ၃​၀​၀ မှ ၃​၅​၀ ဝန်းကျင်​သာ​ရှိ​သည်​အထိ ကျ​ဆင်း​လာ​သည်​ကို တွေ့​ရ​သည်။ ထို့နောက် နိုင်ငံ​ခြား​ငွေ ဒေါ်လာ ၁ သိန်း​ရှိ​သည့် ကုမ္ပဏီ​များ၊ ဝင်ငွေ​ခွန်​ပေး​ဆောင်​ထား​သူ ပြည်​ပ​တွင် အလုပ်​လုပ်ကိုင်​ခဲ့​သူ​များ၊ နိုင်ငံ​ခြား​သင်္ဘောသား​များ ကို​ပါ တင်​သွင်း​ခွင့်​ပြု​ခဲ့​ရာ​မှ ကား​ဈေး​မှာ တ​စ​ထက်​တ​စ​ကျ​ဆင်း​လာ​ခဲ့​သည်။ ။