Saturday, May 19, 2012
မန္တလေးသား ကမ္ဘာကျော် HTC စီအီးအို ဝင်းသန်း (သို့မဟုတ်) Peter Chou
ကမ္ဘာကျော် အီလက်ထရောနစ် Company ဖြစ်တဲ့ HTC (High Tech Computer Coporation) ရဲ့ ဥက္ကဌ Peter Chou ခေါ် ဦးဝင်းသန်း ဟာ မေလ ၁၉ ရက်နေ့၊ မနက် ၁ဝနာရီမှာ လှိုင်တက္ကသိုလ်ဝင်းအတွင်း၊ မြန်မာအိုင်စီတီ (Myanmar Infto-tech) ရှိ ဟောခန်းမတစ်ခုတွင် တွေ့ဆုံဆွေးနွေးပွဲတစ်ခုပြုလုပ်ခဲ့ပါတယ်။
တွေ့ဆုံပွဲမှာ မြန်မာနိုင်ငံသား နည်းပညာလောကမှ လူငယ်၊လူကြီးများနှင့္ အတွေ့အကြုံများ ဆွေးနွေးတိုင်ပင် ခဲ့ကြပါတယ်။ ပီတာချူးဟာ မြန်မာနိုင်ငံဖွားဖြစ်ပြီး မွေးရပ်ဇာတိက မန္တလေးမြို့ဖြစ်ပါတယ်။ ၁၉၅၃ ခုနှစ်ဖွား ပီတာချူးဟာ မန္တလေးဒေသကောလိပ်မှာ ပညာသင်ယူခဲ့ပါတယ်။ ဒုတိယနှစ် ရောက်တဲ့အခါမှာ ကျောင်းကထွက်ပြီး ထိုင်ဝမ်နိုင်ငံကို သွားရောက်လုပ်ကိုင်ခဲ့ပါတယ်။ စစရောက်ချင်းမှာ သူဟာ အီလက်ထရောနစ်အင်ဂျင်နေယာအနေဖြင့် ထိုင်ဝမ် အီလက်ထရောနစ် Company တစ်ခုမှာ ဝင်ရောက်လုပ်ကိုင်ခဲ့ပါတယ်။
အလုပ်လုပ်ကိုင်ပြီးတော့ ပညာဆက်လက်သင်ကြားဖို့ စိတ်ကူးရလာတဲ့အခါမှာ သူဟာ National Taiwan Ocean University တက်ရောက်ခဲ့ပါတယ်။ ၁၉၈၅ခုနှစ်မှာ Electronic Engineering ဘွဲ့ရရှိခဲ့ပြီး ၁၉၉၇ ခုနှစ်မှာ HTC Coporation ကို စတင်တည်ထောင်ခဲ့ပါတယ်။ အင်ဂျင်နေယာ ၁၀ ဦးနဲ့စတင်တည်ထောင်ခဲ့တဲ့ HTC ဟာ ကမ္ဘာ့အဆင့်မှီ အီလက်ထရောနစ်ပစ္စည်းများကိုသာထုတ်လုပ်မယ် လို့ ဆုံးဖြတ်ချက်ချပြီး လုပ်ကိုင်ခဲ့ပါတယ်။ ဒါကြောင့် နှစ်နှစ်အတွင်းမှာ အရှိန်အဟုန်နဲ့အောင်မြင်လာခဲ့ပါတယ်။ သူဟာ ပညာသင်ကြားခြင်းကို မရပ်တန့်ခဲ့ပါဘူး။၂၀၀၃ ခုနှစ်မှာ National Chenghi University မှ MBA ဘွဲ့ရရှိခဲ့ပါတယ်။ ဒါ့အပြင် ၂၀၀၆ ခုနှစ်မှာ အရေိကန်နိုင်ငံ၊ Harvard Business School မှ Advanced Management Program တက်ရောက်အောင်မြင်ခဲ့ပါသေးတယ်။
ဦးဝင်းသန်း ခေါ် ပီတာချူးရဲ့ ကြိုးစားမှုကြောင့် HTC ရဲ့ အောင်မြင်မှုအရှိန်အဟုန်ဟာ မြင့်မားခဲ့ပြီး ကမ္ဘာ့ပထမဆုံး Window စမတ်ဖုန်းထုတ်လုပ်နိုင်တဲ့ Company ဖြစ်လာခဲ့ပါတယ်။ Microsoft ပိုင်ရှင် ဘီလ်ဂိတ် နဲ့ စတင်လုပ်ကိုင်ခဲ့တဲ့ Window Phone ဟာ HTC တစ်ခုတည်းမဟုတ်တော့ပဲ Nokia တို့လို Company ကြီးတွေပေါ်ထွက်လာပါတယ်။ ပြိုင်ဘက်တွေရှိနေသော်ငြားလည်း HTC ဟာ စမတ်ဖုန်း ဈေးကွက်ရဲ့ ထိပ်တန်း ငါးခုစာရင်းမှာ ပါဝင်ခဲ့ပါတယ်။ စမတ်ဖုန်းနည်းပညာပထမဆုံး စတင်တီထွင်တဲ့ Company များထဲမှ ထိပ်တန်းစာရင်းထဲမှာ ပါဝင်သူဖြစ်ပါတယ်။
လက်ရှိ မှာ ကမ္ဘာ့ အကောင်းဆုံးအိုင်တီ Company ၁၀၀ မှ နံပါတ် ၁၁ ၊ အာရှမှာ ထိပ်တန်းငါးခုစာရင်းဝင်ပြီး ပီတာချူးကိုယ်တိုင်ဟာ ကမ္ဘာ့အလွမ်းမိုးဆုံးအိုင်တီလုပ်ငန်းရှင် (CEO) ၅ ဦးစာရင်းမှာ ပါဝင်နေသူဖြစ်ပါတယ်။
သူဟာ မြန်မာပြည်မှာနေခဲ့စဉ်ကတည်းက အိုင်တီနည်းပညာကို အင်မတန်စိတ်ဝင်စားသူဖြစ်ပါတယ်။ ၁၉၇၀ နှောင်းပိုင်းကာလမှာ ပညာသင်ရတဲ့ ပီတာချူးဟာ မန္တလေးမြို့ ၈၃ လမ်းမှာ လျှပ်စစ်ပစ္စည်းပြင်ဆိုင်လေးဖွင့် လှစ်ခဲ့ဖူးပါတယ်။ သီအိုရီထက် လက်တွေ့ကိုအားသန်တဲ့ ပီတာချူးဟာ ကျောင်းတက်ရက်မမှန်ပါဘူး။ တစ်လမှာ မြန်မာငွေကျပ် ၃၀ သာဝင်ငွေရှိတဲ့ ဝင်းသန်းဟာ ထိုင်ဝမ်နိုင်ငံသွားဖို့ စိတ်ကူးရခဲ့ပါတယ်။ ကျောင်းပညာ တစ်ဝက်တစ်ပြတ်နဲ့ တိုင်းတစ်ပါးမှာ သွားရောက်လုပ်ကိုင်ဖို့ စိတ်အားထက်သန်ခဲ့တဲ့ ဝင်းသန်းဟာ လက်တွေ့မှာ ထူးချွန်သူဖြစ်တဲ့အတွက် ထိုင်ဝမ် အီလက်ထရောနစ် Company များက နှစ်သက်ခဲ့ပါတယ်။ နောက်ပိုင်းတော့ သီအိုရီပိုင်းလည်းအရေးကြီးတယ်လို့ သိလာတော့ ထိုင်ဝမ်မှာ တက္ကသိုလ် ဆက်လက်တက်ရောက်ခဲ့ပါတယ်။
တက္ကသိုလ်မှာ သူငယ်ချင်းများနဲ့ HTC ဆိုတဲ့ ကော်ပိုရေးရှင်းကို ၁၉၉၇ ခုနှစ်ကစတင်တည်ထောင်ပါတယ်။ အင်ဂျင်နေယာ ၁၀ဦးနဲ့စတင်တည်ထောင်တဲ့ HTC ဟာ အမှန်တော့ အဆင့်မြင့် ကွန်ပျူတာများ ထုတ်လုပ်ဖို့ ဖြစ်ပါတယ်။ သို့ပေမဲ့ မိုဘိုင်းဖုန်းနည်းပညာမှာ အခြားအဖွဲ့အစည်းများထက် ထူးခြားပြောင်မြောက်အောင် တီထွင်နိုင်ခဲ့ပြီး ဒီဂျစ်တယ်ဖုန်းမှ စမတ်ဖုန်းသို့ ကူးပြောင်းပေးတဲ့ ပထမဆုံး Company များစာရင်းမှာ ပါဝင်ခဲ့ပါတယ်။ အမေရိကန်အခြေဆိုက် မိုက်ခရိုဆော့ခ် Company မှ ဥက္ကဌ ဘီလ်ဂိတ်ကိုယ်တိုင် ပီတာချူးကို ဖိတ်ကြားပြီး လုပ်ငန်းဆိုင်ရာဆွေးနွေးခဲ့ပါတယ်။ ဘီလ်ဂိတ်ရဲ့ ကမ်းလှမ်းချက်ကို သဘောတူပြီး Window ဖုန်းဖြစ်ပေါ်လာဖို့ ပူးပေါင်းလုပ်ကိုင်ခဲ့ပါတယ်။ ယင်းနောက်ပိုင်း HTC စမတ်ဖုန်းဟာ Window Phone လောကမှာ ဆရာတစ်ဆူဖြစ်လာခဲ့ပါတယ်။ ကမ္ဘာကြီးကို ပြောင်းလဲစေမယ်လို့ ဆုံးဖြတ်ချက်ချ ကြိုးစားခဲ့ပါတယ်။ ငွေရဖို့ရည်ရွယ်ချက်နဲ့ အသက်မွေးဝမ်းကြောင်းလုပ်ကိုင်ခြင်းဟာ ညံ့ဖျင်းပြီ ကမ္ဘာကို အကျိုးထူးစေမယ်ဆိုတဲ့ ရည်ရွယ်ချက်ကသာ အောင်မြင်စေနိုင်တယ်လို့ ယုံကြည်ထားသူ ဖြစ်ပါတယ်။ ယနေ့အချိန်ထိလည်း အောင်မြင်လျက်ရှိနေတဲ့ HTC ဟာ မြန်မာပြည်ဖွား ဦးဝင်းသန်းခေါ် ပီတာချူးက ဦးဆောင်လုပ်ကိုင်နေတာဟာ ဂုဏ်ယူစရာဖြစ်ပါတယ်။
၃၃ နှစ်ကြာပေမဲ့ မြန်မာပြည်ကို မမေ့ပါဘူး။ ပီတာချူးရဲ့ ငယ်သူငယ်ချင်းများကလည်း မြန်မာ့ အိုင်တီလောကမှာ အောင်မြင်နေကြပါတယ်။ MCPA ဥက္ကဌ ဦးသောင်းတင်ဟာ ပီတာချူးရဲ့ငယ်သူငယ်ချင်း ဖြစ်ပြီး မြန်မာပြည်လာရောက်ရန် ဖိတ်ကြားမှုကို လက်ခံခဲ့ပါတယ်။ မြန်မာပြည်ရောက်ရောက်ချင်း မြန်မာစကား ပြောဖို့ ခဲယဉ်းပေမဲ့ မန္တလေးမှာ တစ်ပတ်သွားရောက်နေထိုင်ပြီးနောက် ဗမာလို အဆင်ချောစွာပဲ ပြောဆိုနိုင်ခဲ့ပါတယ်။ တွေ့ဆုံဆွေးနွေးပွဲမှာလည်း မေးမြန်းသူများကို မြန်မာလိုရော၊ အင်္ဂလိပ်လိုပါ ပီပီပြင်ပြင်ဖြေကြားခဲ့တဲ့ ဦးဝင်းသန်းကို လာရောက်သူ ဧည့်သည်များ လေးစားခဲ့ရပါတယ်။
ဆွေးနွေးပွဲမှာ သူ့ဘဝအတွေ့အကြုံများကို အထက်ပါအတိုင်း ရှင်းလင်းပြောကြားသွားခြင်းဖြစ်ပါတယ်။ မြန်မာပြည်မှာလည်း သူ့လို အောင်မြင်တဲ့ အိုင်တီလောကသားများ ပေါ်ထွက်လာဖို့မျော်လင့်ကြောင်း ပြောကြားခဲ့ပါတယ်။
ပီတာချူးဟာ သူအောင်မြင်မှုရရှိဖို့အတွက် ကိုင်ဆွဲထားတဲ့ ဆောင်ပုဒ်များကို ရှင်းလင်းပြောပြခဲ့ပါတယ်။ အချက်၃ ချက်ရှိပြီး Passion, Fearless နှင့် Vision ဖြစ်ပါတယ်။
“လူတိုင်းဟာ သူ့ဝါသနာပါရာသူ လုပ်ဆောင်သင့်ပါတယ်။ ကျွန်တော်ဆိုငယ်ငယ်က ဂီတာတီးတာဝါသနာပါတယ်။ ရေကူးတယ်။ သူငယ်ချင်းတွေနဲ့အတူ ဝါသနာပါရာ စိတ်အပန်းဖြေ ကစားကြတယ်။ ဒါတွေကို ချုပ်တည်းမထားရပါဘူး။ Innovation လုပ်နိုင်ဖို့ စိတ်ကို လွတ်လွတ်လပ်လပ်ထားဖို့လိုပါတယ်။ ဒါကြောင့် လူတစ်ယောက်ဟာ အောင်မြင်ဖို့အတွက် Passion က အဓိကကျပါတယ်။ နောက်တစ်ချက်ကတော့ Fearless ပါ။ ဘာကိုမှ ကြောက်ရွံ့မှုမရှိရပါဘူး။ လုပ်ချင်တာတွေကို လုပ်နိုင်ရမယ်။ အခက်အခဲတွေဘယ်လောက်ပဲရှိရှိ။ ပတ်ဝန်းကျင်နဲ့အခြေအနေကြောင့် မိမိရဲ့ ရည်မှန်းချက်တွေ ပျောပျက်သွားတာဟာ အင်မတန်ပျော့ညံ့မှုပါ။ မှားတာကိုလည်း မကြောက်ရပါဘူး။ လူတိုင်းအမှားလုပ်ကြပါတယ်။ အမှားကနေပဲ သင်ခန်းစာယူရပါတယ်။ မှားတယ်ဆိုတာ သဘာဝတရားပါ။ မှားမှာကြောက်နေရင်ဘာမှ ဖြစ်လာမှာမဟုတ်ပါဘူး။ နောက်တစ်ချက်က Vision။ ကျွန်တော် HTC စထောင်တော့ မူဝါဒခိုင်ခိုင်ထားပါတယ်။ ဒါကတော့ ကမ္ဘာ့အဆင့်မှီ (World Class) ကိုပဲ တီထွင်ဖန်တီးမယ်ဆိုတာမျိုးပါ။ အဆင့်နိမ့်ပစ္စည်းများ ထုတ်လုပ်ဖို့ လုံးဝစိတ်မကူးခဲ့ပါဘူး။ ဒါကြောင့်ပဲ အချိန်တိုတွင်းမှာ အောင်မြင့်တာဖြစ်ပါတယ်။ ကျွန်တော်ကျောင်းသားဘဝက ဒီဂျစ်တယ်ပညာရပ်ကို လေ့လာသူနည်းပါတယ်။ ယင်းဒီဂျစ်တယ်ပညာကို ရွေးချယ်လိုက်တဲ့ ကျွန်တော့ကိုတောင် လောင်ပြောင်ခဲ့ကြပါ သေးတယ်။ သို့ပေမဲ့ ဒါတွေဟာ တစ်နေ့အောင်မြင်မယ်ဆိုတာကို ကြိုမြင်ထားတဲ့ ကျွန်တော်ဟာ HTC ကို အကောင်းဆုံးလုပ်နိုင်ခဲ့ပါတယ်။”
အထက်ပါအတိုင်း ပီတာချူးဟာ သူ့ရဲ့ခံယူချက်ကို ပြောဆိုခဲ့ပါတယ်။
“မြန်မာပြည်အတွက်ဆို ကျွန်တော်ဘာမဆိုလုပ်ပါ့မယ်။ နည်းပညာဆိုင်ရာဖွံ့ဖြိုးဖို့အတွက် ရင်းနှီးဖို့အစီအစဉ်တွေရှိပါတယ်။ ဒီတစ်ခါလာရောက်တာကတော့ လေ့လာတဲ့သဘောပဲ ရှိပါသေးတယ်။ ဘာမှ ရင်းနှီးမြှုပ်နှံဖို့မရှိသေးပါဘူး။ နေပြည်တော်က အစိုးရအဖွဲ့ဝင်တွေကိုလည်း သွားရောက်တွေ့ဆုံခဲ့ပြီးပါပြီ။ HTC လာရောက်ရင်းနှီးမြှုပ်နှံဖို့ကို ကြိုဆိုတာတွေ့ရတဲ့အတွက အထူးပင်ဝမ်းသာပါတယ်။ HTC ကိုမြန်မာပြည်မှ သိလောက်မယ်လို့ မထင်ခဲ့ဘူး။ သို့ပေမဲ့ HTC ဟာ မြန်မာပြည်မှာလည်း လူသိများတဲ့ Brand တစ်ခုဖြစ်နေတယ်လို့ သိရတဲ့အတွက် ဝမ်းသာပီတိဖြစ်ရပါတယ်။ မြန်မာပြည်ရဲ့ နိုင်ငံရေးအရပြောင်းလဲမှုတွေ မြန်ဆန်ပါတယ်။ ပြောင်းလဲမှုတွေဟာ အကောင်းဘက်ဦးတည်တဲ့အတွက် ကျွန်တော်တို့လာရောက်ရင်းနှီးလုပ် ကိုင်ဖို့ ပိုမိုလွယ်ကူလာမှာဖြစ်ပါတယ်။ မြန်မာ့ဆက်သွယ်ရေးနဲ့ ပူးပေါင်းလုပ်ကိုင်မည့်အစီအစဉ်၊ မန္တလေးမှာ HTC အရောင်းစင်တာ ဖွင့်လှစ်မယ်ဆိုတာတွေကတော့ မဟုတ်ပါဘူး။ ကျွန်တော်ပြောသလိုပဲ ဒီတစ်ခါက Listen လာလုပ်တဲ့သဘောပဲရှိပါသေးတယ်။
မြန်မာ့ကွန်ပျူတာနဲ့ ွOS လောကမှာ မြန်မာ input system ဖြစ်ပေါ်လာဖို့ HTC မှ ကြိုးစားပါမယ်။ ဒါဟာ အင်မတန် အရေးကြီးပါတယ်။ မြန်မာစာစနစ်ကို မြန်မာ့အိုင်တီလောကမှာ အလွယ်တကူသုံးနိုင်ဖို့ဆိုတာ လိုအပ်ပါတယ်။ ဒါကို ကျွန်တော်တို့လုပ်ဖို့ Plan ရှိပါတယ်။ မြန်မာပြည်တွင်းက ကွန်ပျူတာပညာရှင်များနဲ့လည်း ဆွေးနွေးတိုင်ပင်လျက်ရှိပါတယ်။
မြန်မာပြည်မှလူငယ်များအတွက် ဖောင်ဒေးရှင်းတစ်ခုဖန်တီးပေးခဲ့ပါတယ်။ ဒါကတော့ စဉ့်ကူဖောင်ဒေရှင်းလို့ အမည်ရပြီး မြန်မာလူငယ်တွေကို Innovation မှာ ပါဝင်လာနိုင်ဖို့ မြေတောင်မြောက်ပေးပါမယ်။ ဒီအတွက် ကျွန်တော်နဲ့ MCPA ဥက္ကဌ ကိုသောင်းတင်နဲ့အတူ တိုင်ပင်ဆုံးဖြတ်ခဲ့တာဖြစ်ပါတယ်။”
ဟု ပီတာချူးဟာ သူနေခဲ့တဲ့ တက္ကသိုလ်အဆောင်အမည်ကို အမှတ်တရဖြစ်စေပြီး စဉ့်ကူလို့အမည်ပေးခဲ့ပါ တယ်။ တစ်နှစ်တစ်ခါ ဖောင်ဒေးရှင်းအစည်းအဝေးကိုလာရောက်ဖို့လည်း သဘောတူကတိပေးခဲ့ပါတယ်။ တွေ့ဆုံဆွေးနွေးပွဲဟာ နေ့လည် ၁၁ နာရီခွဲမှာ ပြီးဆုံးခဲ့ပြီး MCPA မှ ပီတာချူးကို အမှတ်တရ လက်ဆောင်ပေးအပ်ခဲ့ပါတယ်။
Subscribe to:
Post Comments (Atom)
No comments:
Post a Comment